ప్రేమ పేరుతో మోసం.. తల్లయిన యువతి

శంషాబాద్‌, న్యూస్‌టుడే: ప్రేమిస్తున్నా.. పెళ్లి చేసుకుంటా నంటూ మాయ మాటలతో యువతి(20)ని ఓ యువకుడు లొంగదీసుకున్నాడు. ఆమె గర్భం దాల్చింది. పెళ్లి చేసుకోవాలని ఒత్తిడి చేసింది. రేపు మాపు అంటూ కాలయాపన చేశాడు. రోజులు గడవడంతో ఆ యువతి ఆసుపత్రిలో మగ బిడ్డకు జన్మనిచ్చింది. ఈ సంఘటన శంషాబాద్‌లో ఆలస్యంగా వెలుగు చూసింది. పోలీసులు తెలిపిన కథనం ప్రకారం.. స్థానికంగా ఉండే మహిళకు పదిహేనేళ్ల క్రితమే భర్త చనిపోయాడు. దినసరి కూలి పని చేస్తూ ఇద్దరు కుమార్తెలు, ఓ కుమారుడిని చదివించింది. పెద్ద కుమార్తె వివాహం చేయగా చిన్న కుమార్తె(20) ఏడాది నుంచి విమానాశ్రయంలోని ఓ హోటల్‌లో పారిశుద్ధ్య విభాగంలో పని చేస్తోంది. అక్కడే పని చేస్తున్న ఆమనగల్‌కు చెందిన మహేశ్‌తో ఏర్పడిన పరిచయం ప్రేమగా మారింది. పెళ్లి చేసుకుంటానని నమ్మించి అత్యాచారం చేశాడు. గర్భవతి కావడం.. నెలలు నిండే సమయం సమీపించడంతో పరారయ్యాడు. కేసు నమోదు చేశారు.