నార్త్‌ కేప్‌ 4000 విజయవంతం

యాత్ర పూర్తి చేసిన శశికాంత్‌, కృష్ణ కూనం

రాయదుర్గం, న్యూస్‌టుడే: నగరానికి చెందిన ఇద్దరు ఔత్సాహిక సైకిలిస్టులు ఐరోపా ఖండంలోని ఆరు దేశాల మీదుగా సాగిన 3,800 కిలోమీటర్ల ‘నార్త్‌కేప్‌ 4000’ సైకిల్‌ రైడ్‌ను విజయవంతంగా పూర్తి చేశారు. 22 రోజుల్లో పూర్తి చేయాల్సిన సాహసయాత్రను నాలుగు రోజుల ముందే 18 రోజుల్లోనే గమ్యం చేరుకొని మన్ననలందుకున్నారు. గచ్చిబౌలి హైదరాబాద్‌ బైసైక్లింగ్‌ క్లబ్‌ (హెచ్‌బీసీ) సభ్యుడు శశికాంత్‌తోపాటు కృష్ణ కూనం ఈ సాహస యాత్రను పూర్తి చేశారు. గత నెల 23వ తేదీన ఇటలీ రోవెరీటో నగరం నుంచి యాత్ర ప్రారంభమై ఈ నెల 9వ తేదీన నార్త్‌ కేప్‌లో ముగిసిందని శశికాంత్‌ తెలిపారు. ఆస్ట్రియా, జర్మనీ, స్వీడన్‌, ఫిన్‌లాండ్‌ మీదుగా నార్వేలోని నిర్దేషిత నార్త్‌ కేప్‌కు 18 రోజుల్లోనే ఇద్దరూ చేరుకున్నట్లు వివరించారు. విభిన్న శీతోష్ణ, భౌగోళిక పరిస్థితులను దాటుతూ ముందుకు సాగామన్నారు. ప్రపంచ వ్యాప్తంగా 320 మంది సైక్లిస్టులు పాల్గొనగా భారత్‌ నుంచి ఏడుగురు ప్రాతినిధ్యం వహించారు.