చిన్నారిపై లైంగిక దాడి.. నిందితుడికి 20 ఏళ్ల జైలు

జగన్నాథ్‌ బెహరా

ఈనాడు, హైదరాబాద్‌: ఎనిమిదేళ్ల చిన్నారిపై లైంగిక దాడికి పాల్పడిన నిందితుడికి మల్కాజిగిరిలోని పోక్సో న్యాయస్థానం 20 ఏళ్ల జైలు శిక్ష, రూ.1,000 జరిమానా విధించింది. ఘట్‌కేసర్‌కు చెందిన భార్యాభర్తలు సమీపంలోని ఓ కళాశాలలో పనిచేస్తూ అందులోనే ఉండేవారు. వారికి ఎనిమిదేళ్ల కుమార్తె ఉంది. 2015 ఆగస్టు 25న రాత్రి చిన్నారి నిద్రిస్తుండగా తల్లిదండ్రులు కళాశాల గదులకు తాళం వేసేందుకు వెళ్లారు. అక్కడే ఉంటున్న ఒడిశాకు చెందిన సెంట్రింగ్‌ కార్మికుడు జగన్నాథ్‌ బెహరా(26) బాలికను పొదల్లోకి తీసుకెళ్లి లైంగిక దాడికి పాల్పడ్డాడు. తల్లిదండ్రులు గమనించగానే.. చిన్నారిని వదిలేసి పారిపోయాడు. బాధితుల ఫిర్యాదు మేరకు అప్పటి ఘట్‌కేసర్‌ సీఐ రవీంద్ర నిందితుడిపై పోక్సో చట్టం కింద కేసు నమోదు చేసి రిమాండ్‌కు తరలించారు. తాజాగా న్యాయమూర్తి బి.సురేశ్‌ తీర్పు వెలువరించారు.