భారత స్వతంత్ర వజ్రోత్సవాలు.. నగరవాసులకు హెచ్ఎండీఏ ఆఫర్

హైదరాబాద్‌: భారత స్వతంత్ర వజ్రోత్సవాల సందర్భంగా నగరవాసులకు హెచ్ఎండీఏ ఆఫర్ ప్రకటించింది. ఆగస్టు 15న నగరంలోని హెచ్ఎండీఏ పరిధిలో ఉన్న అన్ని పార్కుల్లో ఉచితంగా ప్రవేశించేలా ఏర్పాట్లు చేసింది. సాధారణ రోజుల్లో అయితే ఉద్యానవనాల్లో ప్రవేశం కోసం టికెట్‌కు డబ్బులు వసూలు చేస్తారు. 75 వసంతాల స్వాతంత్ర్య వేడుకలను పురస్కరించుకొని 15వ తేదీ ఒక్కరోజు నగరవాసులు, పర్యాటకులకు ఉచిత సదుపాయాన్ని కల్పిస్తున్నట్లు హెచ్‌ఎండీఏ అధికారులు తెలిపారు. నగరంలోని లుంబిని పార్కు, ఎన్టీఆర్ గార్డెన్, సంజీవయ్య పార్కు, లేక్ వ్యూ పార్కు, మెల్కొటే పార్కు, ప్రియదర్శిని పార్కు, రాజీవ్ గాంధీ పార్కు, పటేల్ కుంట పార్కు, లంగర్ హౌస్‌ పార్కు, చిన్నతాళ్లకుంట పార్కులో ఉచిత ప్రవేశాన్ని కల్పించనున్నట్లు అధికారులు తెలిపారు.