అనుమానాస్పద స్థితిలో కార్మికురాలి మృతి

పంజాగుట్ట, న్యూస్‌టుడే: అనుమానాస్పద స్థితిలో మహిళ మృతి చెందిన ఘటన పంజాగుట్ట ఠాణా పరిధిలో చోటుచేసుకుంది. పోలీసులు తెలిపిన వివరాల ప్రకారం.. చింతల్‌ సమీపంలోని భగత్‌సింగ్‌నగర్‌కు చెందిన కానుకుంటల లక్ష్మి(45) జీహెచ్‌ఎంసీలో పారిశుద్ధ్య కార్మికురాలు. 10 రోజులుగా ఎల్లారెడ్డిగూడలో ఓ ఇంటిని అద్దెకు తీసుకుని ఉంటోంది. శుక్రవారం ఉదయం 10 గంటల ప్రాంతంలో లక్ష్మి ఇంటి ఆవరణలో మృతి చెందింది. ఘటనా స్థలానికి చేరుకున్న పోలీసులు ఆమె చెంపలపై గాయాలున్నట్లు గుర్తించారు. కూతురు లత అక్కడికి వచ్చి తన తల్లి చెవి కమ్మలు, గొలుసు కనిపించడం లేదని వివరించింది. అనుమానాస్పద మృతిగా పోలీసులు కేసు నమోదు చేసి దర్యాప్తు చేస్తున్నారు.