సోదరితో గొడవ..మహిళ ఆత్మహత్య

గోషామహల్‌, బేగంబజార్‌: సోదరితో స్వల్ప విషయమై జరిగిన గొడవతో ఓ మహిళ ఆత్మహత్యకు పాల్పడిన ఘటన షాయినాయత్‌గంజ్‌ ఠాణా పరిధిలో చోటుచేసుకుంది. సీఐ అజయ్‌కుమార్‌, పీఎస్సై రాఘవేందర్‌రెడ్డి కథనం ప్రకారం..జుమ్మేరాత్‌బజార్‌ దేవీనగర్‌లో నివసిస్తున్న మానస(21)కు రెండేళ్ల క్రితం వెంకట్‌తో వివాహం జరిగింది. ఏడాది క్రితం  వెంకట్‌ మరో మహిళను వివాహం చేసుకున్నాడు. ఒంటరిగా మిగిలిన మానస తన సోదరి రేణుక వద్ద నివసిస్తోంది. కల్లు తాగే అలవాటున్న మానస తన సోదరితో ఇటీవల తరచుగా గొడవ పడుతోంది. తాజాగా శుక్రవారం రాత్రి స్వల్ప విషయమై ఘర్షణ జరిగింది. కోపోద్రిక్తురాలైన మానస రేణుకపై ఇంటి నుంచి బయటకు వచ్చి షాయినాయత్‌గంజ్‌ ఠాణా పక్కనే ఒంటిపై పెట్రోలు పోసుకొని నిప్పంటించుకుంది. కాలిన గాయాలతో ఆమె ఠాణాలోకి పరుగెత్తింది. పోలీసులు మంటలార్పి ఉస్మానియా ఆసుపత్రికి తరలించారు. పరిస్థితి విషమించడంతో శనివారం మృతి చెందింది.