జిల్లాలకు బస్సులు.. నగరంలో తిప్పలు

ఈనాడు, హైదరాబాద్‌: వరుస సెలవులు రావడంతో నగరవాసులు సొంతూళ్లకు వెళ్లారు. రెండో శనివారం, ఆదివారం, సోమవారం స్వాతంత్య్ర దినోత్సవం కావడంతో ఉద్యోగులు, విద్యార్థులకు సెలవులు వచ్చాయి. నగరం నుంచి తెలంగాణలోని వివిధ జిల్లాలతోపాటు విజయవాడ, కర్నూలు ప్రాంతాలకు ప్రత్యేకంగా బస్సులు నడిపించారు. శుక్ర, శనివారాల్లో దాదాపు 450 ప్రత్యేక బస్సులు పంపించారు. వరంగల్‌వైపు వెళ్లే వారికి ఉప్పల్‌ నుంచి.. విజయవాడ వెళ్లే వారికి ఎల్బీనగర్‌, ఎంజీబీఎస్‌ నుంచి.. సీబీఎస్‌, ఆరాంఘర్‌ నుంచి కర్నూలు వెళ్లే ప్రయాణికుల కోసం బస్సులు ఏర్పాటు చేశారు. నగర డిపోలకు చెందిన బస్సులను ఆయా ప్రాంతాలకు పంపించడంతో ఇక్కడ తిరిగే సర్వీసులలో కోత పడింది.  ప్రయాణికులు తీవ్ర ఇబ్బందులు పడ్డారు. ఆర్డినరీ బస్సులు రద్దీగా కనిపించాయి.