ఉన్నత స్థాయికి వెళ్లలేదని ఆత్మహత్య

పటాన్‌చెరు అర్బన్‌, న్యూస్‌టుడే: ఉన్నతంగా చదివి మంచి ఉద్యోగం చేయాలనే తపన నెరవేరలేదని ఓ సాఫ్ట్‌వేర్‌ ఉద్యోగి మనస్తాపం చెంది బలవన్మరణానికి పాల్పడిన ఘటన పటాన్‌చెరు ఠాణా పరిధిలో జరిగింది. ఏఎస్సై సురేందర్‌రెడ్డి తెలిపిన వివరాల ప్రకారం.. మెదక్‌ జిల్లా నర్సాపూర్‌కు చెందిన భెల్‌ టౌన్‌షిప్‌లో ప్రభుత్వ పాఠశాలలో అటెండర్‌గా నర్సింహులు పనిచేస్తూ పటాన్‌చెరు శ్రీనగర్‌కాలనీ ఉంటున్నారు.  ఇతను పెద్దకుమారుడు ప్రదీప్‌ (25) బీటెక్‌ చదివి మాదాపూర్‌లో సాఫ్ట్‌వేర్‌ ఉద్యోగిగా పనిచేస్తున్నాడు. ఇతను ఎంటెక్‌ చదివి ఉన్నతస్థాయి ఉద్యోగం సంపాదించాలనుకున్నాడు. అది నెరవేరకపోవడంతో మూడురోజులుగా ముభావంగా ఉంటున్నాడు. ఆదివారం ఇంట్లో ఉరిపోసుకుని బలవన్మరణానికి పాల్పడ్డాడు. పోలీసులు కేసు నమోదు చేశారు.