బీసీల డిమాండ్లు పరిష్కరించాలి

గోల్నాక, న్యూస్‌టుడే: బీసీల డిమాండ్లు పరిష్కరించాలని బీసీ సంక్షేమ సంఘం జాతీయ అధ్యక్షుడు, ఎంపీ ఆర్‌.కృష్ణయ్య కేంద్ర ప్రభుత్వాన్ని కోరారు.  బీసీలకు రాజకీయ రంగంలో 14 శాతం, ఉద్యోగ రంగంలో 16, పారిశ్రామిక, వాణిజ్య రంగాల్లో 1, ఉన్నత న్యాయస్థానాల్లో 2, ప్రైవేటు ఉద్యోగాల్లో 5 శాతం మాత్రమే చోటు దక్కిందన్నారు. ఆదివారం కాచిగూడలో బీసీ సంక్షేమ సంఘం జాతీయ కన్వీనర్‌ గుజ్జ కృష్ణ అధ్యక్షతన జరిగిన సమావేశంలో మాట్లాడుతూ కేంద్రంపై ఒత్తిడి పెంచేందుకు పలు పార్టీల నేతలతోపాటు 92 మంది పార్లమెంటు సభ్యులను కలిసినట్లు తెలిపారు. నేతలు కోలా జనార్దన్‌, రామ్‌కోటి, బీరయ్యయాదవ్‌, గుండేటి శంకర్‌, ఉదయ్‌నేత, హేమంత్‌ పాల్గొన్నారు.