అదృశ్యమా? నగదుతో ఉడాయింపా?.. ట్రాన్స్‌జెండర్‌ కనిపించకపోవడంపై రెండు ఫిర్యాదులు

కల్యాణ్‌

అమీర్‌పేట, న్యూస్‌టుడే: ట్రాన్స్‌జెండర్‌ అదృశ్యమైన సంఘటన ఎస్సార్‌నగర్‌ ఠాణా పరిధిలో జరిగింది. ఇన్‌స్పెక్టర్‌ సైదులు తెలిపిన వివరాల ప్రకారం.. బోరబండ సైట్‌-3, బాలాజీ ఎన్‌క్లేవ్‌లో ట్రాన్స్‌జెండర్‌ కల్యాణ్‌(35) మరి కొద్దిమంది సహచరులతో కలిసి ఉంటున్నాడు. ఈనెల 12న తన స్వగ్రామమైన గుంటూరు జిల్లా ఉప్పరపాలేనికి వెళ్లి వస్తానని చెప్పి వెళ్లాడు. అక్కడకు రాలేదని సమాచారం రావడంతో అంతటా గాలించిన సహచరులు మంగళవారం ఉదయం ఎస్సార్‌నగర్‌ పోలీసులకు ఫిర్యాదు చేశారు. కల్యాణ్‌ సహచరుడు వశీం ఇచ్చిన ఫిర్యాదు మేరకు పోలీసులు మిస్సింగ్‌ కేసు నమోదు చేశారు. ఇదిలా ఉంటే కల్యాణ్‌ తమ అందరి వద్దా అప్పు రూపేణా రూ.30లక్షల వరకు తీసుకుని పరారయ్యాడని అతని సహచరులు మరికొందరు సాయంత్రం పోలీసులకు ఫిర్యాదు చేశారు. ఈ అంశాన్ని విచారించి అవసరమైతే సెక్షన్లు మారుస్తామని ఇన్‌స్పెక్టర్‌ చెప్పారు.