ఆర్థిక ఇబ్బందులతో బిల్డర్‌ ఆత్మహత్య

ఉప్పల్‌, న్యూస్‌టుడే: ఉరి వేసుకొని బిల్డర్‌ ఆత్మహత్య చేసుకున్న ఘటన ఉప్పల్‌ పోలీస్‌స్టేషన్‌ పరిధిలో బుధవారం జరిగింది. పోలీసులు తెలిపిన వివరాల ప్రకారం.. ఉప్పల్‌ ఐడీఏలోని లక్ష్మీనారాయణకాలనీలో ఉండే కడాలి రామకృష్ణాప్రసాద్‌(39) బిల్డర్‌గా చేస్తున్నారు. నెల క్రితం వారి కుటుంబం మాదాపూర్‌కు మారింది. మంగళవారం నాగోల్‌లో ఉన్న నిర్మాణాన్ని చూసుకునేందుకు వెళ్తున్నట్లు ఇంట్లో చెప్పి బయలుదేరారు. రాత్రి వరకు కూడా ఇంటికి చేరలేదు. దీంతో కుటుంబ సభ్యులు ఫోన్‌ చేయగా లక్ష్మీనారాయణకాలనీలోని పాత ఇంట్లో ఉన్నట్లు చెప్పారు. బుధవారం ఫోన్‌ చేయగా ఎలాంటి సమాధానం రాలేదు. అనుమానం వచ్చి ఇంటి చుట్టు పక్కల వారు తలుపులు తొలగించి చూడగా చున్నీతో ఫ్యాన్‌కు ఉరి వేసుకొని వేలాడుతూ కనిపించారు. ఆర్థిక ఇబ్బందుల కారణంగానే ఆత్మహత్య చేసుకొని ఉంటాడని మృతుడి భార్య లక్ష్మీత్రివేణి ఫిర్యాదు చేసింది. పోలీసులు కేసు నమోదు చేసుకొని దర్యాప్తు చేస్తున్నారు.