కొండాపూర్‌లో కారు బీభత్సం

పార్కు చేసిన కారుపైకి దూసుకెళ్లిన మరో కారు

గచ్చిబౌలి, న్యూస్‌టుడే: కొండాపూర్‌లో పట్టపగలు ఓ మహిళ మితిమీరిన వేగంతో కారు నడపటంతో అది అదుపు తప్పి ఓ ద్విచక్ర వాహనాన్ని ఢీకొట్టుకుంటూ వెళ్లి రోడ్డు పక్కనే పార్క్‌ చేసి ఉన్న మరో కారు మీదకు ఎక్కి చెట్టును ఢీకొట్టి ఆగిపోయింది. ఈ ప్రమాదంలో ఎవరికీ గాయాలు కాకపోవడంతో అంతా ఊపిరి పీల్చుకున్నారు. కొండాపూర్‌ గౌతమి ఎన్‌క్లేవ్‌ కాలనీ రోడ్డు పక్కనే ప్రైవేటు స్కూల్‌ పార్కింగ్‌ ఏరియాలో శుక్రవారం మధ్యాహ్నం 12.30 సమయంలో ఓ స్కోడా కారును పార్క్‌ చేసిన డ్రైవర్‌ అందులోనే కూర్చొని ఉన్నాడు. ఇంతలో పక్కనే ఉన్న అపార్టుమెంట్‌ నుంచి ఓ మహిళ మితిమీరిన వేగంతో తన కారు నడుపుతూ బయటకు వచ్చింది. అతివేగం కారణంగా ఆమె కారు అదుపుతప్పి రోడ్డు పక్కనే ఆగి ఉన్న ఓ ద్విచక్ర వాహనాన్ని ఢీకొట్టింది. అంతటితో ఆగకుండా అక్కడే పార్క్‌ చేసి ఉన్న స్కోడా కారు మీదకు ఎక్కి చెట్టును ఢీకొట్టింది. ఊహించని ఈ పరిణామంతో స్కోడా కారులో ఉన్న డ్రైవర్‌ భయంతో ఒక్కసారిగా బయటకు పరుగులు తీశాడు. అదృష్టవశాత్తు ప్రమాదంలో ఎవరికీ గాయాలు కాలేదు. స్కోడా కారు ముందు భాగం పూర్తిగా ధ్వంసమైంది.