ప్రాణదాతకు ప్రశంస

కానిస్టేబుల్‌ డి.నవీనను సన్మానించి, రివార్డు అందజేస్తున్న సీవీ ఆనంద్‌

బేగంపేట, న్యూస్‌టుడే: క్రికెట్‌ మ్యాచ్‌ టికెట్ల కోసం జింఖానా మైదానం వద్ద జరిగిన తోపులాటలో సొమ్మసిల్లి పడిపోయిన మహిళకు సీపీఆర్‌ చేసి ప్రాణాలు కాపాడిన మహిళా కానిస్టేబుల్‌ డి.నవీనను నగర పోలీసు కమిషనర్‌ సీవీ ఆనంద్‌ ప్రశంసించారు. గురువారం జింఖానాలో జరిగిన తొక్కిసలాటలో పద్మ అనే మహిళ కిందపడటంతో  కొందరు తొక్కుకుంటూ వెళ్లారు. అపాస్మరక స్థితికి చేరిన బాధితురాలికి బేగంపేట కానిస్టేబుల్‌ నవీన సీపీఆర్‌ చేసి ప్రాణాలు నిలిపారు. ఈ వీడియో సామాజిక మాధ్యమాల్లో వైరల్‌ కావడంతో ఆమెపై ప్రశంసలు వెల్లువెత్తాయి. శుక్రవారం ఆమెను నగర పోలీసు కమిషనర్‌ శాలువా, ప్రశంసా పత్రంతో సన్మానించడంతోపాటు రూ.5వేల నగదు రివార్డు అందజేశారు.