విశ్వేశ్వరయ్య బహుముఖ ప్రజ్ఞాశాలి

పురస్కార గ్రహీతలతో వకుళాభరణం కృష్ణమోహన్‌రావు తదితరులు

రవీంద్రభార[తి, న్యూస్‌టుడే: భారతరత్న మోక్షగుండం విశ్వేశ్వరయ్య ఇంజినీర్‌ మాత్రమే కాదు, గొప్ప రాజనీతిజ్ఞుడు, ఆర్థికవేత్త, సాహితీవేత్త అని తెలంగాణ బీసీ కమిషన్‌ ఛైర్మన్‌ డా.వకుళాభరణం కృష్ణమోహన్‌రావు కొనియాడారు. మెగాసిటీ నవకళా వేదిక ఆధ్వర్యంలో మోక్షగుండం విశ్వేశ్వరయ్య జయంతి ఉత్సవాలు, విశ్వేశ్వరయ్య స్మారక పురస్కారాల ప్రదానోత్సవం శనివారం రవీంద్రభారతిలో నిర్వహించారు. ఈ సందర్భంగా ఆయన మాట్లాడుతూ... వరదలతో అతలాకుతలం అవుతున్న భాగ్యనగరాన్ని కాపాడేందుకు మూసీనదిని అనేక నిర్మాణాలు విశ్వేశ్వరయ్య చేశారన్నారు. తాగునీటి కోసం ఉస్మాన్‌, హిమాయత్‌ సాగర్‌ నిర్మించారని పేర్కొన్నారు. రాష్ట్ర ప్రభుత్వం తాగు, సాగు నీటి రంగాలను ప్రతిష్ఠాత్మకంగా తీసుకొని ముందుకు సాగుతోందన్నారు. ఆధ్యాత్మికవేత్త దైవజ్ఞశర్మ అధ్యక్షోపన్యాసం చేశారు. నటుడు, న్యాయవాది ఎం.హరినాథ్‌బాబు, ప్రముఖ కవి శశిబాల, కార్యక్రమ నిర్వాహకులు మల్లికార్జునరావు పాల్గొన్నారు.