సెంచరీ కొట్టేసిన చిక్కుడు

మెహిదీపట్నం, న్యూస్‌టుడే: నగరంలో కిలో చిక్కుడు సెంచరీ దాటేసింది. మెహిదీపట్నం రైతుబజార్‌లో శనివారం కిలో చిక్కుడు రూ.105కు విక్రయించారు. బహిరంగ మార్కెట్‌లో రూ.120వరకు పలికింది. ఇటీవల భారీ వర్షాలకు పంటలు దెబ్బతినడంతో కూరగాయల దిగుమతి తగ్గి, ధరలు విపరీతంగా పెరిగిపోయాయి. గుడిమల్కాపూర్‌ హోల్‌సేల్‌ మార్కెట్‌లో 10కిలోల ధర రూ.600గా నిర్ణయించారు. అధికారులు నిర్ణయించిన ధర కంటే అధికంగా పెంచి గుడిమల్కాపూర్‌ రిటైల్‌ మార్కెట్‌లో కిలో రూ.120కి విక్రయించారు. తక్కువ దిగుబడి, తదితర కారణాలతో గుడిమల్కాపూర్‌ హోల్‌సేల్‌ మార్కెట్‌కు శనివారం 63 క్వింటాళ్లు, రైతుబజార్‌కి కేవలం 50 కిలోలు మాత్రమే వచ్చిందని గుడిమల్కాపూర్‌ మార్కెట్‌ సీనియర్‌ కమీషన్‌ ఏజెంట్‌ జి.శివరత్నం తెలిపారు.