జడివాన.. హైరానా

దారులు దిగ్బంధం.. వాహనదారులకు తిప్పలు

మలక్‌పేటలో గోడ కూలి ఆటోడ్రైవర్‌ మృతి

ఈనాడు, హైదరాబాద్‌: రాజధానిలో వరుణుడు రెండో రోజూ బీభత్సం సృష్టించాడు. హయత్‌నగర్‌ మండలం భవానీనగర్‌లో మంగళవారం రాత్రి 8గంటల సమయానికి 6సెం.మీ గరిష్ఠ వర్షపాతం నమోదైంది. మధ్యాహ్నం 2.40గంటల నుంచి సాయంత్రం 6 గంటల వరకు పలు ప్రాంతాల్లో కుండపోత వర్షం పడింది. నిమిషాల్లోనే ప్రధాన రహదారులపై మోకాల్లోతున నీరు నిలిచింది. కార్లు, ద్విచక్ర వాహనాలు వరదలో చిక్కుకున్నాయి.  ఎల్బీనగర్‌ నుంచి ఆటోనగర్‌ వరకు విజయవాడ జాతీయ రహదారిపై వాహనాలు బారులు తీరాయి. హయత్‌నగర్‌లోని కమలానగర్‌లో ఇంటి బాల్కనీ కూలి శిథిలాలు పడటంతో ఓ ద్విచక్ర వాహనం ధ్వంసమైంది. భోజగుట్టలో ఓ ఇంటి ప్రహరీ, సమీపంలోని మంగార్‌బస్తీలో ఇంటి గోడలు నేల కూలాయి.  ఓల్డ్‌మలక్‌పేట డివిజన్‌ వాహెద్‌నగర్‌ ఎజాజ్‌ కేబుల్‌ లేన్‌లో ఉండే ఆటోడ్రైవర్‌ మహమ్మద్‌ మక్బూల్‌(41) మంగళవారం ఉదయం ఇంటి ముందు ఆటోకు మరమ్మతులు చేస్తుండగా ప్రహరీ కూలీ మీద పడడంతో మృతి చెందాడు.