రక్షక భటుడే.. గొలుసు దొంగ!

స్థానికులకు దొరికిపోయిన కానిస్టేబుల్‌

గచ్చిబౌలి, న్యూస్‌టుడే: శాంతిభద్రతలను పరిరక్షించాల్సిన ఓ పోలీస్‌ కానిస్టేబులే దొంగగా మారాడు. సాయంత్రం వాకింగ్‌కు వచ్చిన ఓ మహిళ మెడలోంచి బంగారు పుస్తెలతాడు లాక్కొని పారిపోతుండగా స్థానికులు పట్టుకొని పోలీసులకు అప్పగించారు. గచ్చిబౌలి పోలీస్‌స్టేషన్‌ పరిధిలో చోటుచేసుకున్న ఈ సంఘటనకు సంబంధించి డీఐ రవీందర్‌ తెలిపిన ప్రకారం.. సూర్యాపేట జిల్లా అనంతగిరి మండలం, పాలవరానికి చెందిన కంటు రమేష్‌(31) కొంతకాలం క్రితం టీఎస్‌ఎస్‌పీ పోలీసు పటాలంలో కానిస్టేబుల్‌గా విధుల్లో చేరాడు. కాగా ఇతను పోలీసు శాఖకు ఎటువంటి సమాచారం లేకుండా పారిపోవడంతో 8 నెలలుగా విధుల్లో లేడు. సోమవారం సాయంత్రం కొత్తగూడ జీహెచ్‌ఎంసీ పార్క్‌లో మహిళ కె.రాధా వాకింగ్‌ చేస్తుండగా వెనుక నుంచి వెళ్లిన కానిస్టేబుల్‌ రమేష్‌ ఆమె మెడలో ఉన్న 9 తులాల బంగారు పుస్తెలతాడు లాక్కొని పారిపోయాడు. బాధితురాలు గట్టిగా కేకలు వేయడంతో అప్రమత్తమైన స్థానికులు వెంబడించి కొద్ది దూరంలో పట్టుకొని దేహశుద్ధి చేశారు. అనంతరం ఈ విషయమై గచ్చిబౌలి పోలీసులకు సమాచారం అందించారు. సంఘటనా స్థలానికి చేరుకున్న పోలీసులు స్నాచింగ్‌కు పాల్పడిన కానిస్టేబుల్‌ నుంచి పుస్తెలతాడు స్వాధీనం చేసుకొని మంగళవారం అతన్ని రిమాండ్‌కు తరలించారు.