ఇంటర్‌ చదివాడు.. ఎందరినో ముంచాడు!

మాదాపూర్‌, న్యూస్‌టుడే: హైటెక్‌సిటీ ప్రాంతంలో సాఫ్ట్‌వేర్‌ ఉద్యోగమంటూ నిరుద్యోగుల నుంచి లక్షల్లో డబ్బులు వసూలు చేసి మోసానికి పాల్పడిన వ్యక్తిని మాదాపూర్‌ పోలీసులు మంగళవారం అరెస్టు చేసి రిమాండ్‌కు తరలించారు. ఎస్‌ఐ దీక్షిత తెలిపిన వివరాల ప్రకారం.. విశాఖ పట్నానికి చెందిన ప్రతాప్‌ కట్టమూరి(25) ఇంటర్‌ చదివాడు. ఆ తరువాత నగరానికి వచ్చి ఒకటి రెండు కంప్యూటర్‌ కోర్సులు నేర్చుకున్నాడు. డాన్యన్‌ ఐటీ టెక్నాలజీ పేరిట ఓ కంపెనీ ఏర్పాటు చేశాడు. తన కంపెనీలో నిరుద్యోగులకు ఉద్యోగం కల్పిస్తానంటూ ఆన్‌లైన్‌లో ప్రకటనలు గుప్పించాడు. మూడు నెలల శిక్షణ ఆ తరువాత ఉద్యోగమంటూ మాయమాటలు చెప్పాడు. ఇది నమ్మిన నిరుద్యోగులు 200 మంది రూ.లక్ష నుంచి లక్షన్నర వరకు చెల్లించారు. ఆన్‌లైన్‌లోనే మౌఖిక పరీక్షలు నిర్వహించి , ఒక్కోక్కరు ఆన్‌లైన్‌లోనే నిరుద్యోగుల నుంచి డబ్బులు కట్టించుకున్నాడు. 3 నెలలపాటు ఆన్‌లైన్‌లోనే శిక్షణ కార్యక్రమాలు చేపట్టాడు. శిక్షణ కాలంలో ఇవ్వాల్సిన స్టైఫండ్‌ ఇవ్వకపోగా తరువాత ఉద్యోగంలో చేర్చుకొని వేతనం ఇవ్వలేదు. బాధితులు  మాదాపూర్‌ పోలీసులను ఆశ్రయించగా కేసు దర్యాప్తు చేపట్టారు.