చిన్నారిపై అత్యాచారం.. దోషికి 20 ఏళ్ల జైలు

రంగారెడ్డి జిల్లా కోర్టులు: ఐదేళ్ల చిన్నారిపై అత్యాచారానికి పాల్పడిన నిందితుడికి న్యాయస్థానం ఇరవై ఏళ్ల కఠిన కారాగార శిక్ష, రూ.25,000 జరిమానా విధించింది. రంగారెడ్డి జిల్లా మంచాలకు చెందిన గుంట శ్రీనివాస్‌(50) ప్రైవేట్‌ ఉద్యోగి. 2015 డిసెంబరు 7న ఇంటి ముందు ఆడుకుంటున్న చిన్నారి(5)కి మాయమాటలు చెప్పి ఇంట్లోకి తీసుకెళ్లి, అత్యాచారానికి పాల్పడ్డాడు. మంచాల పోలీసులు కేసు నమోదు చేసి నిందితుణ్ని రిమాండుకు తరలించారు. కోర్టులో పోక్సో చట్టం కింద అభియోగ పత్రం దాఖలు చేశారు. రంగారెడ్డి జిల్లా పోక్సో కోర్టు న్యాయమూర్తి బుధవారం తుది తీర్పునిచ్చారు.