కుండపోత.. రహదారులపై ఎదురీత

హయత్‌నగర్‌ ఆర్టీసీ డిపో వద్ద రహదారిపై వరద

ఈనాడు, హైదరాబాద్‌, కాటేదాన్‌, వనస్థలిపురం, మెహిదీపట్నం, న్యూస్‌టుడే: భాగ్యనగరాన్ని వరుణుడు వదలట్లేదు. వరుసగా మూడో రోజూ వర్షం కుండపోతగా కురిసింది. బుధవారం సాయంత్రం మొదలైన వాన రాత్రి వరకు ఒక్కోసారి ఒక్కో ప్రాంతంలో విధ్వంసం సృష్టించింది. మొదట ఎల్బీనగర్‌ ప్రాంతంలో కుండపోత మొదలైంది. సుష్మా, పనామా, చింతల కుంట కూడళ్లలో నీరు మోకాలు లోతున నిలవడంతో వాహనాలు ఆగుతూ ముందుకు కదలాయి. కాటేదాన్‌ వైపు నుంచి ఆరాంఘర్‌ చౌరస్తాకు వెళ్లే రోడ్డుపై రైల్వే అండర్‌ బ్రిడ్జి వద్ద నీరు నిలిచి వాహనాలు మూడు గంటలపాటు నిలిచిపోయాయి. హయత్‌నగర్‌లో రాత్రి 9గంటల వరకు గరిష్ఠంగా 5సెం.మీ వర్షపాతం నమోదవగా, ఖాజాగూడలో 3.8, శివరాంపల్లిలో 3 సెం.మీ. వాన పడింది.