పండగకు ఇంటికి వెళ్తున్నారా..!

దొంగల బారినపడకుండా  సైబరాబాద్‌ పోలీసుల సూచనలు

ఈనాడు- హైదరాబాద్‌: దసరా సెలవుల నేపథ్యంలో సొంతూళ్లకు వెళ్తున్నారా..? సైబరాబాద్‌ పోలీసులు ప్రత్యేక జాగ్రత్తలు సూచిస్తున్నారు. కమిషనర్‌ స్టీఫెన్‌ రవీంద్ర పలు సూచనలు చేశారు. రాత్రివేళ వీధుల్లో గస్తీ సైతం పెంచుతున్నామని వివరించారు.

సూచనలివీ..

* ఊరెళ్లాల్సివస్తే బంగారు, వెండి నగలు, డబ్బును బ్యాంకు లాకర్లలో భద్రపర్చుకోవాలి. లేదంటే రహస్యస్థలంలో దాచుకోవాలి.

* సెక్యూరిటీ అలారం, మోషన్‌ సెన్సార్‌ ఏర్పాటుచేసుకోవాలి. సెంట్రల్‌ లాక్‌సిస్టమ్‌ ఉండాలి.

* ఊరికెళ్లే ముందు దగ్గర్లోని పోలీసుస్టేషన్‌లో సమాచారమివ్వాలి.

* నమ్మకమైన వాచ్‌మెన్‌లనే సెక్యూరిటీకి నియమించుకోవాలి. సీసీకెమెరాలతో ఆన్‌లైన్‌లో పరిశీలిస్తుండాలి.

* ప్రధాన ద్వారానికి తాళం వేసినా కనిపించకుండా పరదాలు అడ్డుగా ఉంచాలి. ఇంటి లోపల, బయట కొన్ని లైట్లు వేసిఉంచాలి. గమనించాలని ఇరుగుపొరుగు వారికి చెప్పాలి.

* కాలనీల్లో దొంగతనాలు అరికట్టేందుకు స్వచ్ఛంద కమిటీలు ఏర్పాటు చేసుకోవాలి. అనుమానాస్పద వ్యక్తుల కదలికలపై డయల్‌ 100 లేదా సైబరాబాద్‌ పోలీసు వాట్సాప్‌ నంబర్‌ 94906 17444కు సమాచారమివ్వాలి.