డేటింగ్‌ యాప్‌తో రూ.1.53 కోట్లు కుచ్చుటోపీ

ఈనాడు - హైదరాబాద్‌: డేటింగ్‌ యాప్‌ ద్వారా కొందరు అమ్మాయిలతో మాట్లాడించిన ఓ సైబర్‌ నేరగాడు.. నగరానికి చెందిన ఓ వ్యక్తి(64)కి రూ.1.53 కోట్లు కుచ్చుటోపీ పెట్టాడు.  దర్యాప్తు చేసిన హైదరాబాద్‌ సైబర్‌ క్రైమ్‌ పోలీసులు దిల్లీకి చెందిన అరుణ్‌ను అరెస్టు చేశారు. కేసు వివరాలను నగర సంయుక్త కమిషనర్‌(సీసీఎస్‌) గజరావు భూపాల్‌ మంగళవారం వెల్లడించారు. దిల్లీకి చెందిన్‌ అరుణ్‌ తన స్నేహితులు మోహిత్‌, దీపక్‌, మంజీత్‌, నీతు సోలంకి మరికొందరితో నకిలీ కాల్‌ సెంటర్‌ ఏర్పాటు చేశాడు. అందులో కొందరు యువతుల్ని నియమించుకున్నాడు. గిగోలో ప్లేబాయ్‌ సర్వీసెస్‌ డేటింగ్‌ యాప్‌ ద్వారా వచ్చే ఫోన్‌కాల్స్‌ను ఆ యువతులతో మాట్లాడిస్తాడు. పద్మారావునగర్‌కు చెందిన ఓ వ్యక్తి ఆ యాప్‌ను డౌన్‌లోడ్‌ చేసుకున్నాడు. దాని ద్వారా యువతులతో మాట్లాడాడు. వారి మాటలు నమ్మి వివిధ బ్యాంకు ఖాతాలకు రూ.1,53,38,527 పంపించాడు. నిందితుడు అరుణ్‌ తన రెండు బ్యాంకు ఖాతాల్లో రూ.22 లక్షలు, రూ.8 లక్షల చొప్పున జమ చేయించుకున్నాడు. చివరికి ఇదంతా మోసమని తెలుసుకున్న బాధితుడు పోలీసులను ఆశ్రయించాడు. దర్యాప్తు చేసిన పోలీసులు దిల్లీలో అరుణ్‌ను అరెస్టు చేశారు. సీసీఎస్‌ ఏసీపీ కేవీఎం ప్రసాద్‌, ఇన్‌స్పెక్టర్‌ ప్రసాద్‌రావు ఉన్నారు.