హెచ్‌సీయూ ఆచార్యుడికి శాంతిస్వరూప్‌ భట్నాగర్‌ అవార్డు

హెచ్‌సీయూ ఉపకులపతి బీజే రావు నుంచి అవార్డు అందుకుంటున్న సురజిత్‌

ఈనాడు, హైదరాబాద్‌: ప్రతిష్ఠాత్మక శాంతిస్వరూప్‌ భట్నాగర్‌ అవార్డును హైదరాబాద్‌ కేంద్రీయ విశ్వవిద్యాలయ(హెచ్‌సీయూ) ఆచార్యుడు ప్రొ.సురజిత్‌ ధారాకు ప్రదానం చేశారు. ఏటా శాస్త్ర, సాంకేతిక రంగాల్లో విశేష సేవలందించే శాస్త్రవేత్తలకు శాస్త్ర, పారిశ్రామిక పరిశోధన మండలి(సీఎస్‌ఐఆర్‌) ఈ గుర్తింపును అందజేస్తోంది. భౌతిక శాస్త్ర విభాగంలో 2020 సంవత్సరానికి సురజిత్‌ ఎంపికయ్యారు. ఏటా ఈ పురస్కారాలను దిల్లీలో ప్రధానమంత్రి హాజరై అందజేస్తుంటారు. రెండేళ్లుగా కరోనా కారణంగా పురస్కారాలను ప్రదానం చేయలేదు. నేరుగా ఆయా విద్యాసంస్థలకే పంపించి విజేతలకు అందించేందుకు సీఎస్‌ఐఆర్‌ నిర్ణయించింది. బుధవారం హెచ్‌సీయూలోని ఫిజిక్స్‌ విభాగంలో ఉపకులపతి ప్రొ.బీజేరావు చేతుల మీదుగా పురస్కారాన్ని సురజిత్‌ అందుకున్నారు. వర్సిటీ భౌతిక శాస్త్ర విభాగం డీన్‌ కె.సి.జేమ్స్‌రాజు, ఆచార్యులు హాజరయ్యారు.