ప్రోత్సాహకం అందక.. పాడి రైతుల నిరాశ

బకాయిల విడుదలతోనే మేలు

పరిగిలోని పాలశీతలీకరణ కేంద్రం

న్యూస్‌టుడే, పరిగి: పాడి పరిశ్రమతో ఉపాధి పొందాలనుకున్న రైతులకు నిరాశ తప్పడం లేదు. తరచూ పాల సేకరణ ధరను పెంచుతున్నప్పటికీ సర్కారు నుంచి అందాల్సిన ప్రోత్సాహకం సకాలంలో విడుదల కావడం లేదు. దీంతో అన్నదాతలకు ఎదురుచూపులే మిగులుతున్నాయి. ప్రధానంగా దాణా ధరలు విపరీతంగా పెరగడంతో పాడి పరిశ్రమ నిర్వహణ భారంగా మారుతోందని కర్షకులు ఆందోళన వ్యక్తం చేస్తున్నారు. జిల్లాలోని పరిగి నియోజకవర్గాన్ని వ్యవసాయాధారిత ప్రాంతంగా గుర్తించి 1972లో పరిగిలో పాలశీతలీకరణ కేంద్రాన్ని ప్రారంభించారు. ఒకప్పుడు 20వేల లీటర్ల పాలను రాష్ట్ర రాజధానికి అందించిన ఘన చరిత్ర ఉంది. అనేక కారణాలతో క్రమక్రమంగా నిర్వీర్యంగా మారుతోంది. ఉత్పత్తిదారులకు ఆర్థిక చేయూతనిచ్చి పాల దిగుబడిని పెంచేందుకు రాష్ట్ర ప్రభుత్వం 2017 సెప్టెంబరు నుంచి లీటరుకు రూ.4 చొప్పున ప్రోత్సాహకాన్ని అందిస్తామని ప్రకటించింది. ఈ మేరకు అప్పుడప్పుడు నిధులు విడుదలవుతున్నా సకాలంలో అందడం లేదు.

రావాల్సినవి రూ.30 లక్షలు

జిల్లాలో నల్గొండ-రంగారెడ్డి పాల ఉత్పత్తిదారుల సహకార సమాఖ్య యూనియన్‌ లిమిటెడ్‌ (నార్ముల్‌) ఆధ్వర్యంలో రెండు పాలశీతలీకరణ కేంద్రాలు నిర్వహిస్తున్నారు. వీటి పరిధిలో నాలుగు రూట్ల ద్వారా 18 ఉప సేకరణ కేంద్రాలున్నాయి. 800 మంది రైతుల నుంచి రోజుకు సుమారు 2500 లీటర్ల పాలను సేకరిస్తున్నారు. గతేడాది జూన్‌ నుంచి బకాయిలు విడుదల కావాల్సి ఉన్నాయి. ఈ లెక్కన సుమారు రూ.30లక్షల వరకు ప్రోత్సాహక నిధులు రావాల్సి ఉంది. సకాలంలో మంజూరైతే పశు దాణాతో పాటు గడ్డి విత్తనాలు, ఇతరత్రా కొనుగోలు చేసుకునేందుకు అవకాశం ఉంటుందని రైతులు చెబుతున్నారు.  

రాయితీలు ఇస్తే..

వేసవిని దృష్టిలో ఉంచుకుని మదర్‌ డెయిరీ అధికారులు ఇప్పటి నుంచే పక్కా ప్రణాళికను రూపొందించాలని పలువురు కోరుతున్నారు. పాల కొరతను అధిగమించేందుకు అన్ని విధాలుగా చర్యలు చేపట్టాలని ప్రతికూల పరిస్థితులతో కొందరు పరిశ్రమను వదులుకోవాల్సి వచ్చిందని అభిప్రాయపడుతున్నారు. పెరుగుతున్న ముడి సరకు ధరలను దృష్టిలో ఉంచుకుని మరిన్ని రాయితీలు ప్రకటించాలని కోరుతున్నారు.