జిల్లాల ఆటోలను నగరంలో అనుమతించాలి

ఆటోడ్రైవర్లను అరెస్టు చేస్తున్న పోలీసులు

నారాయణగూడ, న్యూస్‌టుడే: ఇతర జిల్లాల్లో రిజిస్టర్‌ అయిన ఆటోలనూ నగరంలో అనుమతించాలని పలువురు ఆటోడ్రైవర్లు డిమాండ్‌ చేశారు. ఈమేరకు వివిధ జిల్లాల్లో రిజిస్ట్రేషన్‌ ఉన్న ఆటోల డ్రైవర్లు సోమవారం నాంపల్లిలోని నగర ట్రాఫిక్‌ సంయుక్త కమిషనర్‌ రంగనాథ్‌ కార్యాలయం ముందు నిరసన వ్యక్తం చేశారు. 40కిపైగా ఆటోలను రోడ్లపై నిలిపి నినాదాలతో హోరెత్తించారు. దీంతో ట్రాఫిక్‌ ఎక్కడికక్కడ నిలిచిపోయింది. సైఫాబాద్‌ ఏసీపీ వేణుగోపాల్‌రెడ్డి ఆధ్వర్యంలో ఇన్‌స్పెక్టర్‌ కె.సత్తయ్య సిబ్బందితో కలిసి ఆటోడ్రైవర్లను అరెస్టు చేశారు. చివరకు ఐదుగురు ఆటోడ్రైవర్ల నాయకులతో కూడిన బృందాన్ని సైఫాబాద్‌ పోలీసులు ట్రాఫిక్‌ జాయింట్‌ కమిషనర్‌ వద్దకు చర్చలకు తీసుకెళ్లారు. ఇది వరకు ఉన్నట్లుగా కేవలం రంగారెడ్డి, హైదరాబాద్‌లో రిజిస్టర్‌ అయిన ఆటోలకు మాత్రమే అనుమతి ఉందని ఆయన చెప్పినట్లు తెలిసింది.