గ్రేటర్‌లో మరో 37 బస్తీ దవాఖానాలు

ఈనాడు, హైదరాబాద్‌: గ్రేటర్‌లో కొత్తగా మరో 37 బస్తీ దవాఖానాలను అందుబాటులోకి తీసుకొచ్చేందుకు బల్దియా నిర్ణయించింది. ఇందులో 20 ప్రారంభానికి సిద్ధమైనట్లు మంగళవారం తెలిపింది. మరో 17 ఏర్పాటుకు ఇప్పటికే ప్రతిపాదనలు సిద్ధం చేసినట్లు వెల్లడించింది. గ్రేటర్‌ వ్యాప్తంగా 300 బస్తీ దవాఖానాలను ఏర్పాటు చేయాలని గతంలో నిర్ణయించిన సంగతి తెలిసిందే. ఇప్పటివరకు 263 అందుబాటులోకి తెచ్చారు. కాలనీల పరిధిలో కమ్యూనిటీ హాళ్లు ఇతర ప్రభుత్వ భవనాల్లో వీటిని ఏర్పాటు చేస్తున్నారు. ఆయా ఆసుపత్రుల్లో ఓపీతోపాటు ప్రాథమిక రోగ నిర్ధారణ పరీక్షలు, గర్భిణులు, బాలింతలకు పరీక్షలు, టీకాలు, బీపీ, మధుమేహంతోపాటు తదితర పరీక్షలు చేస్తున్నారు.