ఇన్‌కమ్‌ ట్యాక్స్‌ భవనం పైనుంచి పడి ఉద్యోగి దుర్మరణం

నాంపల్లి, న్యూస్‌టుడే: ఇన్‌కమ్‌ ట్యాక్స్‌ టవర్‌ భవనం ఐదో అంతస్తు నుంచి అనుమానాస్పద స్థితిలో కిందపడి అందులో పనిచేస్తున్న ఓ ఉద్యోగి దుర్మరణం చెందిన ఘటన నాంపల్లి పోలీస్‌స్టేషన్‌ పరిధిలో జరిగింది. పోలీసుల కథనం ప్రకారం... అశుతోష్‌శర్మ(25) స్వస్థలం ఉత్తర్‌ప్రదేశ్‌ గౌతంబుద్ధానగర్‌ జిల్లా సక్కమజ్రబత్త. గత ఏడాది స్టాఫ్‌ సెలెక్షన్‌ కమిషన్‌ ద్వారా ఇన్‌కమ్‌ ట్యాక్స్‌ విభాగంలో మల్టీ టాస్కింగ్‌ స్టాఫ్‌ ఉద్యోగానికి ఎంపికై నగరంలోని ఏసీగార్డ్స్‌లో ఇన్‌కమ్‌ ట్యాక్స్‌ కార్యాలయంలో విధుల్లో చేరాడు. గచ్చిబౌలిలో స్టాఫ్‌ క్వార్టర్స్‌లో నివాసం ఉంటూ ఇన్‌కమ్‌ ట్యాక్స్‌ టవర్‌ కార్యాలయ ఐదో అంతస్తు డి-బ్లాక్‌లో ఇన్‌వార్డ్‌ సెక్షన్‌లో పనిచేస్తున్నాడు. మంగళవారం సాయంత్రం కార్యాలయ భవనం వెనుక వైపున ఏదో పడ్డట్లు పెద్ద శబ్దం రావడంతో తోటి ఉద్యోగులు వెళ్లి చూడగా అశుతోష్‌శర్మ రక్తపుమడుగులో కనిపించడంతో అధికారులు, సెక్యూరిటీ సిబ్బంది కలిసి పోలీసులకు సమాచారం అందించారు. ఘటనా స్థలికి చేరుకున్న నాంపల్లి పోలీసులు పరిశీలించగా అప్పటికే అతడు మృతిచెంది ఉండటంతో పోస్ట్‌మార్టమ్‌ నిమిత్తం మృతదేహాన్ని ఉస్మానియా మార్చురీకి తరలించారు. ఆత్మహత్య చేసుకున్నాడా.. లేక ప్రమాదవశాత్తు పడ్డాడా.. అని పోలీసులు విచారిస్తున్నారు. అశుతోష్‌శర్మ పైచదువులకు సన్నద్ధమవుతున్నాడని, ఈలోగానే కుటుంబీకులు పెళ్లి సంబంధం చూడటంతో నిరాకరించాడని, వారం రోజులుగా ముభావంగా ఉంటున్నాడని, వచ్చే నెల మొదటి వారంలో ఊరెళ్లేందుకు సెలవు కూడా పెట్టిన్నట్లు తోటి ఉద్యోగులు చెప్పారని పోలీసులు వెల్లడించారు.కేసు నమోదు చేసుకుని పోలీసులు దర్యాప్తు చేస్తున్నారు.