‘యశోద’ సినిమాపై కేసు ఉపసంహరణ

ఈనాడు, హైదరాబాద్‌: సమంత ప్రధాన పాత్రధారిగా తెరకెక్కిన ‘యశోద’ సినిమాలో ఈవా ఐవీఎఫ్‌ ఆసుపత్రి పేరు వాడకంపై తలెత్తిన వివాదం ముగిసింది. న్యాయస్థానాన్ని ఆశ్రయించిన ఆ ఆసుపత్రి యాజమాన్యం, చిత్ర నిర్మాత శివలెంక కృష్ణప్రసాద్‌ మధ్య జరిగిన చర్చలు ఫలించాయి. సినిమాలో ఆసుపత్రి పేరు కనిపించకుండా చేసిన మార్పులపై ఆసుపత్రి యాజమాన్యం సంతృప్తి చెందుతూ కేసు ఉపసంహరించుకుంది. ఈ విషయంపై నిర్మాత శివలెంక కృష్ణప్రసాద్‌ మంగళవారం హైదరాబాద్‌లో మీడియాతో మాట్లాడారు. ఒకరిని బాధపెట్టే ఉద్దేశం, ఒకరి మనోభావాల్ని కించపరిచే ఆలోచన మాకు లేదని తెలిపారు. మా బ్రాండ్‌కి ఇబ్బంది కలగడంతోనే కేసు వేశాం తప్ప, డబ్బు కోసం కాదని ఆస్పత్రి ఎండీ మోహన్‌రావు వివరించారు.