Hyderabad: పూజల పేరుతో మోసాలు.. అరెస్టు చేసిన పోలీసులు

హైదరాబాద్‌: పూజల పేరుతో మోసాలకు పాల్పడుతున్న వ్యక్తిని హైదరాబాద్‌ సైబర్‌క్రైం పోలీసులు అరెస్టు చేశారు. పంజాబ్‌లోని మొహాలీకి చెందిన లలిత్‌ అనే వ్యక్తి పూజల పేరుతో హైదరాబాద్‌లోని బాధితురాలి నుంచి ఏకంగా రూ.47 లక్షలు వసూలు చేసినట్లు పోలీసులు తెలిపారు. వివరాల్లోకి వెళ్తే.. జ్యోతిషంతో సమస్యలు తీరుస్తానని సామాజిక మాధ్యమాల్లో ప్రచారం చేసుకున్న లలిత్‌ను బాధిత మహిళ మూడు నెలల క్రితం సంప్రదించారు. మొదటి పూజ పేరుతో మహిళ నుంచి అతడు రూ.32 వేలు వసూలు చేశారు. ఆ తర్వాత విడతల వారీగా రూ.47 లక్షలు వసూలు చేశాడు. అయితే అనుకున్న పనులు నెరవేరకపోవడంతో.. బాధితురాలు ప్రశ్నించింది. దీంతో అతడు ఫోన్‌ ఆఫ్‌ చేసేశాడు. దీంతో మోసపోయానని గుర్తించిన బాధితురాలు సైబర్‌ క్రైం పోలీసులకు ఫిర్యాదు చేశారు.  మహిళ ఫిర్యాదు మేరకు లలిత్‌ను అరెస్టు చేసిన పోలీసులు.. అతడి నుంచి రెండు చరవాణులు, 2 డెబిట్‌ కార్డులు, చెక్‌బుక్‌ స్వాధీనం చేసుకున్నారు.