తూచ్‌.. చెరువు కాదది.. సెల్లారు గుంత

చెరువు ఉన్నట్లు చూపుతున్న గూగుల్‌ చిత్రం

ఈనాడు, హైదరాబాద్‌: అసలు విషయం తెలియక ఏకంగా మంత్రి కేటీఆర్‌కు ట్విట్టర్‌లో చేసిన ఫిర్యాదుతో సోమవారం అధికార యంత్రాంగం ఉరుకులు పరుగులు పెట్టింది. చెరువుకు, పూడ్చిన సెల్లారు గుంతకు తేడా తెలియని ఓ నెటిజన్‌ చేసిన హడావుడి అంతాఇంతా కాదు. వివరాలివీ.. కేపీహెచ్‌బీ నాలుగో ఫేజ్‌లోని ఆర్టీఓ కార్యాలయం వెనుక ఉండే చెరువు కనిపించడం లేదంటూ కేటీఆర్‌కు ట్విట్టర్‌లో ఓ నెటిజన్‌ ఫిర్యాదు చేయగానే మంత్రి వెంటనే స్పందించారు. గతంలో అక్కడ చెరువు ఉన్నట్లు, ఇప్పుడు పూడ్చినట్లు తెలిపే గూగుల్‌ పటాలతో ఫిర్యాదు రాగానే నిజమైతే వెంటనే చర్యలు తీసుకోవాలని జిల్లా పాలనాధికారులను, జీహెచ్‌ఎంసీ అధికారులను ఆదేశించారు. జడ్సీ మమత సర్కిల్‌ కమిషనర్‌తో తనిఖీ చేయించగా అసలు విషయం వెల్లడైంది. రాష్ట్ర గృహ నిర్మాణ సంస్థ.. గతంలో చేపట్టిన ప్రాజెక్టుకోసం ఆర్టీఓ కార్యాలయం వెనుక సెల్లారు తవ్వారు. ప్రాజెక్టు రద్దయి సెల్లారులో నీరు చేరి చుట్టుపక్కల కాలనీ పిల్లలు కొందరు అందులో పడి చనిపోయారు. దీంతో ఆ సెల్లారుగుంతను పూడ్చేశారు. ఇదే విషయాన్ని మంత్రికి విన్నవించారు. అందరూ ఊపిరి పీల్చుకున్నట్లయింది.

ప్రస్తుతమిలా.. సెల్లార్‌ గుంత పూడ్చివేసిన తరువాత