సారూ.. పురుగులన్నం పెడుతున్నారు

ఇన్‌స్పెక్టర్‌ మహేందర్‌రెడ్డితో మాట్లాడుతున్న చిన్నారి

బాలాపూర్‌, న్యూస్‌టుడే: సారూ మధ్యాహ్న భోజనంలో పురుగు వచ్చింది. అది చూసి అన్నం పడేశానని పాఠశాలకు రావద్దంటూ టీచర్‌ బెదిరించారు.. అంటూ నాలుగో తరగతి విద్యార్థిని బుధవారం మీర్‌పేట పోలీసులను ఆశ్రయించింది. పోలీసులు తెలిపిన వివరాల ప్రకారం.. మీర్‌పేట ప్రశాంతిహిల్స్‌లో నివాసం ఉంటున్న శ్రీను కుమార్తె పూజిత స్థానిక ప్రాథమిక పాఠశాలలో నాలుగో తరగతి చదువుతోంది. మంగళవారం మధ్యాహ్న భోజన సమయంలో ఆమెకు వడ్డించిన అన్నంలో పురుగు రావడంతో పడేసింది. విషయం తెలుసుకున్న టీచర్‌ అన్నం తిననందుకు పాఠశాలకు రావొద్దని బెదిరించింది. దీంతో బుధవారం తల్లితో కలిసి మీర్‌పేట ఠాణాకు వెళ్లి ఇన్‌స్పెక్టర్‌ మహేందర్‌రెడ్డికి జరిగిన సంఘటన గురించి వివరించింది. వెంటనే ఆయన ఏఎస్‌ఐ తిరుపతయ్యను పాఠశాలకు పంపించారు. అక్కడికి వెళ్లి పరిశీలించగా నిజంగానే కూరగాయలు బాగోలేవని, బియ్యం కూడా మట్టి పట్టి ఉన్నట్లు  గుర్తించినట్లు వివరించారు. చిన్నారులకు మంచి ఆహారాన్ని అందించాలని సూచించి వచ్చారు. ఇదే విషయంపై ప్రధానోపాధ్యాయుడు గంగాధర్‌కు ఫోన్‌ చేయగా విద్యార్థిని రెండు రోజుల నుంచి పాఠశాలకు రావడం లేదని తెలిపారు. ఎంఈఓ కృష్ణ స్పందించి గురువారం పాఠశాలకు వెళ్లి చిన్నారులతో మాట్లాడి తగు చర్యలు తీసుకుంటామని తెలిపారు.