వదినపై కన్నేసిన మరిది

వివాహం వద్దన్నదని ఘాతుకం

కేశంపేట, న్యూస్‌టుడే: వదినను వివాహం చేసుకుంటానని వెంబడించాడు. వేధించాడు. నిరాకరించడంతో.. కత్తితో దాడికి తెగబడిన  ఘటన కేశంపేటలోని పీహెచ్‌సీలో గురువారం చోటుచేసుకుంది. పోలీసుల కథనం ప్రకారం.. మంచాల మండలం ఎల్లమ్మతండాకు చెందిన యువతి(23) షాద్‌నగర్‌లో హాస్టల్‌లో ఉంటూ పీహెచ్‌సీలో పనిచేస్తోంది. ఆమె చెల్లిని ఆటోడ్రైవర్‌ సభావట్‌ కిషన్‌(35) ప్రేమ వివాహం చేసుకున్నాడు. భార్య అక్కను పెళ్లి చేసుకుంటానంటూ వేధిస్తున్నాడు. విధుల్లో భాగంగా బుధవారం రాత్రి ఆమె ఆసుపత్రిలోనే పడుకుంది. గురువారం తెల్లవారుజామున ఆసుపత్రిలోకి వచ్చిన కిషన్‌ వదినపై కత్తితో దాడి చేశాడు. తోటి సిబ్బంది ఆమెను రక్షించారు. అతన్ని గదిలో బంధించి పోలీసులకు తెలిపారు. వారు వచ్చేలోపు అతడు పారిపోయాడు. క్షతగాత్రురాలిని ఆసుపత్రికి తరలించగా ప్రాణాపాయం తప్పింది. ఆమె ఫిర్యాదు ఆధారంగా నిందితుడిపై హత్యాయత్నం కేసు నమోదు చేశారు.