నలుదిక్కులా బలోపేతం

నగరానికి కొత్తగా 20మంది డీసీపీలు

ఈనాడు, హైదరాబాద్‌: విశ్వనగరంగా అడుగులు వేస్తున్న రాజధానిలో పోలీసింగ్‌ మరింత బలోపేతం కానుంది. మూడు కమిషనరేట్లలో కొత్తగా శాంతి భద్రతలు, ట్రాఫిక్‌, ఎస్‌వోటీ జోన్లు ఏర్పాటుచేసిన ప్రభుత్వం.. తాజాగా వాటికి బాధ్యుల్ని నియమించింది. బుధవారం రాష్ట్రవ్యాప్తంగా ఐపీఎస్‌ల బదిలీల్లో భాగంగా మూడు కమిషనరేట్లలో కొత్తగా 20 మంది డీసీపీలు వచ్చారు. ఇటీవల కొత్తగా ఏర్పాటైన జోన్లకు వీరంతా నేతృత్వం వహిస్తారు. మరో 16 మంది డీసీపీ స్థాయి అధికారులు బదిలీ అయ్యారు. కరీంనగర్‌ సీపీ వి.సత్యనారాయణ రాచకొండ సంయుక్త కమిషనర్‌గా బదిలీ అయ్యారు. గతంలో రాచకొండ సంయుక్త కమిషనర్‌గా బదిలీ అయిన గజరావు భూపాల్‌.. తిరిగి హైదరాబాద్‌ సీసీఎస్‌ జేసీ బాధ్యతల్లోనే కొనసాగుతున్నారు.

కొత్త జోన్లతో సమర్థ పోలీసింగ్‌

కొత్త నియామకాల్లో భాగంగా ఎస్‌వోటీ, యాంటీ నార్కోటిక్‌ బ్యూరోలు ఏర్పాటయ్యాయి. డ్రగ్స్‌, బెట్టింగ్‌ తదితర వ్యవస్థీకృత నేరాలకు అడ్డుకట్ట వేయడంలో ఈ బృందాలు కీలకపాత్ర పోషిస్తున్నాయి. తాజా బదిలీల్లో భాగంగా రాచకొండ(మల్కాజిగిరి, ఎల్బీనగర్‌), సైబరాబాద్‌(డీసీపీ, డీసీపీ-2)కు కలిపి నాలుగు కొత్త ఎస్‌వోటీ జోన్లకు డీసీపీలను నియమించారు. మహేశ్వరం, రాజేంద్రనగర్‌, మేడ్చల్‌ పేరుతో కొత్తగా శాంతిభద్రతల డీసీపీలు రానున్నారు.  

నగరంలోని మూడు కమిషనరేట్ల పరిధిలో కొత్తగా ఏర్పాటైన జోన్లలో 20 మంది డీసీపీలు,  ఇతర విభాగాలు, జోన్లలో మరో 16 మంది డీసీపీలు బాధ్యతలు తీసుకోనున్నారు. వివరాలివీ..