ద్విచక్రవాహనం అదుపు తప్పి.. కుక్కింద సర్పంచి మృతి

ధారూర్‌: ద్విచక్ర వాహనం అదుపు తప్పి కిందపడి సర్పంచి మృతి చెందిన సంఘటన మండల పరిధిలోని శనివారం చోటుచేసుకుంది. పోలీసులు తెలిపిన ప్రకారం కుక్కింద గ్రామ సర్పంచి (సర్పంచుల సంఘం మండల అధ్యక్షులు) కారంజి వీరేశం (48) శుక్రవారం రాత్రి గ్రామం నుంచి ధారూర్‌ వెళ్తుండగా మార్గమధ]్యలో అంగడిచింతల దగ్గర ద్విచక్ర వాహనం అదుపుతప్పి కింద పడ్డారు. ఈ ఘటనలో ఆయన తలకు తీవ్ర గాయాలయ్యాయి. గమనించిన స్థానికులు వెంటనే వికారాబాద్‌ ఆసుపత్రికి తరలించారు. అక్కడ పరిశీలించిన వైద్యులు అప్పటికే మృతిచెందినట్లు తెలిపారు. మృతదేహాన్ని మార్చురీకి తరలించి పోస్టుమార్టం అనంతరం కుటుంబ సభ్యులకు అప్పగించారు. మృతుని కుమారుడు శశికిరణ్‌ ఫిర్యాదు మేరకు కేసు నమోదుచేసి దర్యాప్తు చేస్తున్నట్లు ఎస్‌ఐ నరేందర్‌ తెలిపారు. మృతునికి భార్య, కూతురు, కుమారుడు ఉన్నారు. 

ఎమ్మెల్యే పరామర్శ

సర్పంచి వీరేశం రోడ్డు ప్రమాదంలో మృతి చెందిన విషయం తెలుసుకున్న స్థానిక ఎమ్మెల్యే మెతుకు ఆనంద్‌ గ్రామానికి వెళ్లి కుటుంబ సభ్యులను ఓదార్చారు. అనంతరం అంతిమ యాత్రలో పాల్గొన్నారు. ఆయన వెంట పార్టీ నాయకులు, కార్యకర్తలు, వివిధ గ్రామాల సర్పంచులు, ఎంపీటీసీలు తదితరులు ఉన్నారు.