జూదం కేసులో ఫిర్జాదిగూడ డిప్యూటీ మేయర్‌ అరెస్టు

బోడుప్పల్‌: ఆదివారం రాత్రి పర్వతాపూర్‌లోని సాయి ఐశ్వర్య కాలనీలో జూదం వ్యవహారంలో ఫిర్జాదిగూడ నగర పాలక సంస్థ డిప్యూటీ మేయర్‌ కుర్రా శివకుమార్‌ గౌడ్‌పై మేడిపల్లి పోలీసులు కేసు నమోదు చేశారు. డిప్యూటీ మేయర్‌తో పాటు కార్పొరేటర్‌ కె.మహేశ్, పలువురు భారాస నాయకులు యాకారం మహేశ్‌, ఎల్‌.రఘుపతిరెడ్డి, టి.శ్రీధర్‌రెడ్డి, పి.అంజిరెడ్డి, సీహెచ్‌ జగదీశ్వరరెడ్డి, బి.కృష్ణలతోపాటు మరో ఆరుగురిపై మేడిపల్లి పోలీసులు కేసు నమోదు చేసి అరెస్ట్‌ చేశారు. ముందస్తు సమాచారంతో మల్కాజిగిరి ఎస్‌వోటీ పోలీసులు జూదం శిబిరంపై ఆకస్మిక దాడులు నిర్వహించారు. ఈ దాడిలో సుమారు రూ.23 లక్షల వరకు నగదును స్వాధీనం చేసుకున్నారు.