‘రాజీ’యే మార్గం..వివరించండి

సమన్వయ సమావేశంలో న్యాయవాదులు, పోలీసులు

వికారాబాద్‌, న్యూస్‌టుడే: ఈ నెల 11న జరిగే జాతీయ లోక్‌ అదాలత్‌లో అధిక కేసులు రాజీ చేసుకునేలా ప్రజలకు అవగాహన కల్పించాలని జిల్లా ప్రధాన న్యాయమూర్తి సుదర్శన్‌ తెలిపారు. గురువారం న్యాయస్థాన ఆవరణలో పోలీసులు, న్యాయవాదులతో జరిగిన సమన్వయ సమావేశంలో ఆయన మాట్లాడారు. చిన్నచిన్న తప్పులు, పొరపాట్లతో న్యాయస్థానాల చుట్టూ తిరుగుతూ నష్టపోతున్నామని భావించే వారు తమ తప్పులను బేషరతుగా అంగీకరిస్తే.. చిన్నపాటి జరిమానా విధించి వారిపై ఉన్న కేసును కొట్టివేస్తారన్నారు. పోలీస్‌ ఠాణాల వారీగా రాజీ పడదగిన కేసులను పోలీసులు గుర్తించి ఇరువర్గాలకు అవగాహన కల్పించి రాజీ పడేలా ప్రోత్సహించాలన్నారు. న్యాయవాదులు కూడా తమ క్లయింట్లు కేసులు రాజీ పడే విధంగా కృషి చేయాలని చెప్పారు. కార్యక్రమంలో జిల్లా న్యాయ సేవాధికార సంస్థ కార్యదర్శి శీతల్‌, జూనియర్‌ న్యాయమూర్తి శ్రీకాంత్‌, వికారాబాద్‌ డీఎస్పీ సత్యనారాయణ, సీఐలు, ఎస్‌ఐలు, న్యాయవాదులు పాల్గొన్నారు.