తల్లికి వేధింపులు... కుమారుడికి 18 రోజుల జైలు

చాదర్‌ఘాట్‌, న్యూస్‌టుడే: కన్న తల్లిని వేధించిన కుమారుడికి కోర్టు 18 రోజుల పాటు జైలు శిక్ష విధించింది. చాదర్‌ఘాట్‌ ఠాణా ఎస్సై పాండు తెలిపిన వివరాల ప్రకారం.. ఓల్డ్‌మలక్‌పేట పాపయ్యబస్తీకి చెందిన శకుంతలకు ముగ్గురు కుమారులు. రెండో కుమారుడు సురేష్‌(33) జులాయిగా తిరుగుతుండే వాడు. వివాహం అనంతరం భార్యతో కలిసి మల్కాజిగిరిలో ఉంటున్నాడు. అప్పుడప్పుడు తల్లి దగ్గరికి వచ్చి డబ్బులివ్వాలంటూ కొట్టడమే కాకుండా అసభ్య పదజాలంతో దూషించేవాడు. కొడుకు చేష్టలతో విసుగు చెందిన ఆమె చాదర్‌ఘాట్‌ ఠాణాలో గత డిసెంబరు 27న ఫిర్యాదు చేసింది. పోలీసులు అరెస్టు చేయగా 6వ ప్రత్యేక మెట్రోపాలిటన్‌ మెజిస్ట్రేట్‌ ఎస్‌.లక్ష్మణ్‌రావు గురువారం తీర్పు వెల్లడించారు.