మృతుడికీ పదోన్నతి!

టీఎస్‌ఎస్పీడీసీఎల్‌లో ఏఏఈ ప్రమోషన్లలో విచిత్రం 

ఈనాడు, హైదరాబాద్‌: రెండేళ్ల క్రితం చనిపోయిన సబ్‌ ఇంజినీర్‌కు దక్షిణ తెలంగాణ విద్యుత్తు పంపిణీ సంస్థ (టీఎస్‌ఎస్పీడీసీఎల్‌) పదోన్నతి కట్టబెట్టిన వైనమిది. సంస్థ పరిధిలో గురువారం 57 మంది సబ్‌ ఇంజినీర్లకు అడిషనల్‌ అసిస్టెంట్‌ ఇంజినీర్‌ (ఏఏఈ), అసిస్టెంట్‌ ఇంజినీర్లుగా పదోన్నతులు కల్పించింది. వీరిలో ఏఏఈ పదోన్నతులు పొందిన వారు 49 మంది ఉన్నారు. వరస క్రమంలో 44వ స్థానంలో ఉన్న సబ్‌ ఇంజినీర్‌ పి.మల్లయ్యకు ఏఏఈ ప్రమోషన్‌ ఇచ్చి మెట్రోజోన్‌ నుంచి వికారాబాద్‌ సర్కిల్‌కు బదిలీ చేసినట్లుగా ఉత్తర్వులు ఇచ్చారు. మల్లయ్య హైదరాబాద్‌ నార్త్‌ జోన్‌ విధులు నిర్వహించేవారని రెండేళ్ల క్రితం అనారోగ్యంతో మృతి చెందారని మెట్రో జోన్‌ ఉద్యోగులు అంటున్నారు. కారుణ్య నియామకాల కింద మల్లయ్య కూతురుకు సైబర్‌ సిటీ సర్కిల్‌లో చాలాకాలం క్రితమే సబ్‌ ఇంజినీర్‌గా ఉద్యోగం కూడా డిస్కం కల్పించింది. అయినా రికార్డులు అప్‌డేట్‌ కాకపోవడంతో కార్పొరేట్‌ కార్యాలయంలో హెచ్‌ఆర్‌ విభాగం విమర్శలు ఎదుర్కొంటోంది. నేరుగా పదోన్నతుల జాబితాను విడుదల చేయడం.. అందులో మృతుడికి పదోన్నతి దక్కడంతో తోటి సబ్‌ ఇంజినీర్లే అవాక్కవుతున్నారు.