కంటోన్మెంట్‌ విలీనంపై సంప్రదింపులు: కేంద్ర మంత్రి

ఈనాడు, దిల్లీ: సికింద్రాబాద్‌ కంటోన్మెంట్‌ పరిధిలోని పౌర నివాస ప్రాంతాలను జీహెచ్‌ఎంసీలో విలీనం చేసేందుకు ఎనిమిది మంది సభ్యులతో కమిటీ ఏర్పాటుచేసినట్లు రక్షణ శాఖ సహాయ మంత్రి అజయ్‌భట్‌ పేర్కొన్నారు. మల్కాజిగిరి ఎంపీ రేవంత్‌రెడ్డి అడిగిన ప్రశ్నకు మంత్రి సమాధానమిచ్చారు. నిర్ణయం తీసుకునేముందు భాగస్వాములరందరితో(స్థానిక ఎంపీలు, ఎమ్మెల్యేలు) సంప్రదిస్తామని మంత్రి వెల్లడించారు.

* వికారాబాద్‌ జిల్లా అనంతగిరిలో ఆయుష్‌ ఆసుపత్రి నిర్మాణానికి కేంద్ర ప్రాయోజిత పథకం కింద రూ.6 కోట్లు ఇచ్చేందుకు ఆయుష్‌ శాఖ 2016-17లోనే ఆమోదించిందని ఆ శాఖ మంత్రి సర్బానంద సోనోవాల్‌ తెలిపారు. ఎంపీలు రంజిత్‌రెడ్డి, ఎం.కవిత, వెంకటేష్‌ అడిగినప్రశ్నకు మంత్రి లిఖితపూర్వక సమాధానమిచ్చారు.