‘ఐటీఐఆర్‌పై రాష్ట్రానిది అసత్య ప్రచారం’

మాట్లాడుతున్న ఎమ్మెల్యే రఘునందన్‌రావు

గన్‌ఫౌండ్రి, న్యూస్‌టుడే: ఐటీఐఆర్‌ ప్రాజెక్టు విషయమై భారాస ప్రభుత్వం కేంద్రంపై అసత్య ప్రచారం చేస్తోందని భాజపా ఎమ్మెల్యే ఎం.రఘునందన్‌రావు ఆరోపించారు. ఐటీఐఆర్‌ ఫేజ్‌-1 కింద కేంద్ర ప్రభుత్వం ప్రతిపాదిత నిధుల కంటే ఎక్కువే ఇచ్చిందన్నారు. రాష్ట్ర ప్రభుత్వమే పనులు చేయకుండా కేంద్రాన్ని తప్పుపడుతోందని విమర్శించారు. ఈ విషయమై మంత్రి కేటీఆర్‌ బహిరంగ చర్చకు రావాలని కోరారు. లేని పక్షంలో ఐటీఐఆర్‌ ప్రాజెక్టు ఫేజ్‌-1 కింద రూపొందించిన డీపీఆర్‌, కేంద్రం ఇచ్చిన నిధులు, రాష్ట్ర ప్రభుత్వం చేసిన ఖర్చుపై శ్వేతపత్రం విడుదల చేయాలని డిమాండ్‌ చేశారు. మంగళవారం పార్టీ రాష్ట్ర కార్యాలయంలో ఆయన ఈ మేరకు విలేకరులతో మాట్లాడారు.  బీహెచ్‌ఈఎల్‌ కూడలి అభివృద్ధికి కేంద్ర సర్కారు రూ.12 వందల కోట్లు మంజూరు చేసిందన్నారు. మహేశ్వరంలోని మన్సాన్‌పల్లిలో ఏర్పాటు చేసిన సైన్స్‌ పార్కుకు కేంద్రం రూ.150 కోట్లు, ఈ-సిటీ అభివృద్ధికి రూ.400 కోట్లు ఇచ్చిందని గుర్తుచేశారు.