పద్దులో బీసీలకు అన్యాయం: జాజుల

మంత్రి కేటీఆర్‌ మాటలను సెల్‌ఫోన్‌లో  వినిపిస్తున్న జాజుల శ్రీనివాస్‌గౌడ్‌

కవాడిగూడ, న్యూస్‌టుడే: రాష్ట్ర బడ్జెట్‌లో బీసీలకు అన్యాయం చేశారని బీసీ సంక్షేమ సంఘం జాతీయ అధ్యక్షుడు జాజుల శ్రీనివాస్‌గౌడ్‌ అన్నారు. బుధవారం దోమలగూడ బీసీ భవన్‌లో విలేకరుల సమావేశంలో ఆయన మాట్లాడారు. కేంద్ర ప్రభుత్వం బీసీలకు 5 శాతం కేటాయించలేదని వాదించిన మంత్రి కేటీఆర్‌ రాష్ట్ర బడ్జెట్‌లో రెండు శాతమే కేటాయించడం ద్వంద్వ వైఖరిని చాటిందన్నారు. కేటీఆర్‌ మాటలను మొబైల్‌లో వినిపించారు. బడ్జెట్‌లో జరిగిన అన్యాయాన్ని నిరసిస్తూ ఈ నెల 13న రాష్ట్రంలోని జిల్లా కలెక్టర్‌ కార్యాలయాలను ముట్టడించాలని పిలుపునిచ్చారు. బీసీ సంక్షేమ సంఘం తెలంగాణ రాష్ట్ర కార్యదర్శి జాజుల లింగం, గ్రేటర్‌ అధ్యక్షుడు మాదేశీ రాజేందర్‌, బీసీ మహిళా సంఘం రాష్ట్ర కార్యనిర్వాహక అధ్యక్షురాలు మణిమంజరి తదితరులు పాల్గొన్నారు.