Hyderabad: అదృష్ట రాయి అంటూ.. రూ.2 కోట్లకు బేరం

స్వాధీనం చేసుకున్న రాయి

చర్లపల్లి, కాప్రా, న్యూస్‌టుడే: అదృష్ట రాయి అంటూ మోసానికి పాల్పడుతున్న ఇద్దరిని కుషాయిగూడ పోలీసులు అరెస్టు చేశారు. వారు తెలిపిన వివరాల ప్రకారం.. వరంగల్‌ జిల్లా ఖాజీపేటకు చెందిన బి.చందు, యాప్రాల్‌కు చెందిన సాంబశివరావు అమాయకులను మోసం చేయడానికి కుట్ర పన్నారు. రాయి లోపల బ్యాటరీతో కూడిన లైటు అమర్చి.. నీళ్లలో వేయగానే కాంతి వచ్చేలా రూపొందించారు. సాగరకన్య నోటి నుంచి జారిపడిన అదృష్టరాయి అని.. జలకాంతగా పిలిచే దీన్ని ఇంట్లో ఉంచుకోవడంతో అద్భుత శక్తులు వస్తాయంటూ నమ్మించారు. కాప్రా ప్రాంతంలో రూ.2 కోట్లకు బేరం కుదిర్చారు. అమ్మేందుకు సిద్ధపడ్డారు. మల్కాజిగిరి ఎస్‌వోటీ పోలీసులు రెక్కీ నిర్వహించి పట్టుకున్నారు. నిందితుల నుంచి రాయి, మూడు చరవాణులు, కారు స్వాధీనం చేసుకున్నారు.