Hyderabad: స్వప్నలోక్‌ను కూల్చాలా.. వద్దా?

పిల్లర్లు, స్లాబు సామర్థ్య పరీక్షలు పూర్తయ్యాక నిర్ణయం
జేఎన్‌టీయూ నిపుణుల బృందం వెల్లడి

కాంప్లెక్స్‌ను తాత్కాలికంగా మూసివేసినట్లు ఏర్పాటు చేసిన ఫ్లెక్సీ

ఈనాడు, హైదరాబాద్‌, రెజిమెంటల్‌బజార్‌, న్యూస్‌టుడే: సికింద్రాబాద్‌ స్వప్నలోక్‌ కాంప్లెక్సులో గురువారం చోటు చేసుకున్న భారీ అగ్ని ప్రమాదం దృష్ట్యా.. భవన సముదాయాన్ని కూల్చాలా, వద్దా అనే ప్రశ్నలు రేకెత్తుతున్నాయి. అందుకు సమాధానం లభించాలంటే వారం పడుతుందని జేఎన్‌టీయూ నిపుణుల బృందం వెల్లడించింది. నిర్మాణం ఏ మేర దెబ్బతిన్నదనే అంశాన్ని పరిశీలించేందుకు శనివారం జేఎన్‌టీయూ ప్రొఫెసర్లు డి.ఎన్‌.కుమార్‌, శ్రీలక్ష్మి సిబ్బందితో కలిసి భవనాన్ని పరిశీలించారు. వారు మాట్లాడుతూ.. ప్రమాదం ఐదో అంతస్తులో జరిగినప్పటికీ.. నాలుగు, ఆరు అంతస్తులు కూడా దెబ్బతిన్నాయని చెప్పారు.

భవనం మొత్తానికి పరీక్ష.. : అగ్ని ప్రమాదంతో దెబ్బతిన్న అంతస్తులతోపాటు భవనం మొత్తానికి పరీక్ష చేయాలని జీహెచ్‌ఎంసీ నిర్ణయించింది. 38ఏళ్ల నాటి భవనం కావడంతో.. కాంప్లెక్సు చుట్టూ బాల్కనీలు, సన్‌షేడ్‌, ఇతర నిర్మాణాలు దెబ్బతిన్నాయి. 2019లో ఈ భవనంలో పెచ్చులూడి ఓ వ్యక్తి చనిపోయారు. అప్పట్లో యజమానికి నోటీసులు ఇవ్వగా స్పందన కొరవడింది. నాన్‌ డిస్ట్రక్టివ్‌ పరీక్ష  అనంతరం కాంప్లెక్సుపై తుది నిర్ణయం తీసుకుంటామని అధికారులు ‘ఈనాడు’తో తెలిపారు.

ఐదో అంతస్తులో దగ్దమైన గది

పోలీసుల అదుపులో ముగ్గురు : అగ్ని ప్రమాదం జరిగిన ఐదో అంతస్తులోని కేడియా ఇన్ఫోటెక్‌, క్యూనెట్‌కు చెందిన ముగ్గురిని మహంకాళి పోలీసులు అదుపులోకి తీసుకొని విచారిస్తున్నారు. క్యూనెట్‌కు ఇండియాలో అనుబంధంగా కొనసాగుతున్న విహాన్‌ సంస్థకు చెందిన భాను, శివ, కేడియా ఇన్ఫోటెక్‌ యజమానినీ అదుపులోకి తీసుకున్నారు.  స్వప్నలోక్‌ - సూర్యకిరణ్‌ ఎస్టాబ్లిష్‌మెంట్‌ అసోసియేషన్‌పైనా పోలీసులు కేసు నమోదు చేశారు. స్వప్నలోక్‌తో పాటు సూర్యకిరణ్‌ కాంప్లెక్స్‌ సీజ్‌ చేసి బోర్డులు పెట్టారు.