సమాజాన్ని కాపాడేది సాహిత్యం

‘చీకటి పువ్వు’ తొలి ప్రతిని కృష్ణక్కకు అందజేసిన రచయిత్రి కత్తి పద్మ,
చిత్రంలో వసీరా, సతీష్‌చందర్‌, శివారెడ్డి, కాత్యాయని, ఏకే ప్రభాకర్‌

రవీంద్రభారతి, న్యూస్‌టుడే: సమాజాన్ని కాపుకాసేది సాహిత్యం అని కవి కె.శివారెడ్డి అన్నారు. కత్తి పద్మ రచించిన ‘చీకటి పువ్వు’ కథల పుస్తక పరిచయ సభ ఆదివారం రవీంద్రభారతిలో నిర్వహించారు. ఈ సందర్భంగా ఆయన మాట్లాడుతూ.. ఈ పుస్తకం జీవన కావ్యమని, మనం చూడని ఎన్నో విషయాలు అక్షరరూపంలో రచయిత్రి అందించారన్నారు. ఇందులోని కథలు, పాత్రలు సృష్టించినవి కాదని, ఉద్యమజీవితంలో రచయిత్రి చూసిన జీవితాలని పేర్కొన్నారు. సాహితీవేత్త కాత్యాయని ప్రసంగిస్తూ.. వైవిధ్యమైన కథలను తనదైనశైలిలో ఆవిష్కరించారని పేర్కొన్నారు. సాహితీవేత్త సతీష్‌చందర్‌ మాట్లాడుతూ.. పుస్తకంలోని కథల్లో లీనమై చదివినప్పుడే అందులోని భావాన్ని అర్ధం చేసుకోగలమన్నారు. నాలుగు దశాబ్దాలు ప్రజాక్షేత్రంలో  ఉన్నా పద్మ కొంత ఆలస్యంగా అయినా సాహితీ క్షేత్రంలోని అడుగుపెట్టారని రచయిత ఏకే ప్రభాకర్‌ పేర్కొన్నారు. కార్యక్రమానికి వర్మ సమన్వయకర్తగా వ్యవహరించారు.