విద్యారంగ సమస్యలపై రాష్ట్రవ్యాప్త పర్యటన

ఏవీఎన్‌ రెడ్డిని సత్కరించిన తెలంగాణ ప్రాంత ఉపాధ్యాయ సంఘం నేతలు

నారాయణగూడ, న్యూస్‌టుడే: విద్యారంగ, ఉపాధ్యాయ సమస్యలపై రాష్ట్ర వ్యాప్తంగా పర్యటిస్తానని హైదరాబాద్‌, మహబూబ్‌నగర్‌, రంగారెడ్డి ఉమ్మడి జిల్లాల ఉపాధ్యాయ ఎమ్మెల్సీగా గెలుపొందిన ఎ.వి.ఎన్‌ రెడ్డి అన్నారు. ఈనెల 29న ప్రమాణ స్వీకారం అనంతరం ఈ కార్యక్రమానికి శ్రీకారం చుట్టనున్నట్లు ప్రకటించారు. తెలంగాణ ప్రాంత ఉపాధ్యాయ సంఘం (టీపీయూఎస్‌) ఆధ్వర్యంలో ఆదివారం రాత్రి నారాయణగూడ కేశవ స్మారక విద్యా సంస్థల సభామందిరంలో సంఘం అధ్యక్షుడు హనుమంతరావు, ప్రధాన కార్యదర్శి సురేష్‌ తదితరులు ఆయన్ని సత్కరించారు. ఈ సందర్భంగా ఏవీఎన్‌ రెడ్డి మాట్లాడుతూ.. విద్యా రంగానికి సంబంధించి అన్ని సమస్యలపై దృష్టి సారించి ప్రభుత్వాన్ని నిలదీస్తానన్నారు. తన గెలుపుకు సహకరించిన ఉపాధ్యాయులకు కృతజ్ఞతలు తెలిపారు. సంఘం అధ్యక్ష, కార్యదర్శులు మాట్లాడుతూ.. 10వ తరగతి పరీక్షల మూల్యాంకనాల కేంద్రాలు పాత జిల్లాల్లోనే ఉన్నాయని, జిల్లాల విభజన జరిగిన నేపథ్యంలో కొత్త జిల్లాలో కేంద్రాలు ఏర్పాటు చేయాలని కోరారు. వేతనాలు ప్రతి నెల మొదటి తేదీన చెల్లించాలని డిమాండ్‌ చేశారు.