హెల్మెట్‌ ధరించి ఉంటే ప్రాణాలు నిలిచేవి

ద్విచక్రవాహనం అదుపుతప్పి కిందపడి ఒకరి దుర్మరణం

రమేశ్‌

హయత్‌నగర్‌: శిరస్త్రాణం ధరించండి అని పోలీసులు, స్వచ్ఛంద సంస్థలు ఎంతగా ప్రచారం చేస్తున్నా కొందరు చెవికెక్కించుకోవడం లేదు. తమ నిర్లక్ష్యంతో ప్రాణాలు పోగొట్టుకొని.. కుటుంబాన్ని రోడ్డున పడేస్తున్నారు. అందుకు తాజా ఘటనే ఉదాహరణ.. ద్విచక్రవాహనం అదుపుతప్పి కిందపడిన ఓ యువకుడి తలకు తీవ్రగాయాలై అక్కడికక్కడే ప్రాణాలు కోల్పోయిన ఘటన హయత్‌నగర్‌ ఠాణా పరిధిలో చోటుచేసుకుంది. పోలీసులు, కుటుంబ సభ్యుల కథనం మేరకు...ఘట్‌కేసర్‌ పరిధి గాంధీనగర్‌కు చెందిన సంకు రమేశ్‌ (32) భార్య, ఇద్దరు కుమార్తెలతో కలిసి కొన్నాళ్లుగా సరూర్‌నగర్‌లో ఉంటున్నాడు. ఆదివారం స్వగ్రామంలో స్నేహితుడి సోదరుడి వివాహ విందుకు వెళ్లాడు. అనంతరం రాత్రి సుమారు 11 గంటల సమయంలో రమేష్‌ తన ద్విచక్ర వాహనంపై ఘట్‌కేసర్‌ నుంచి ఓఆర్‌ఆర్‌ సర్వీస్‌ రోడ్డు మీదుగా బయలుదేరాడు. రాత్రి 12.30గంటల సమయంలో గౌరెల్లి వద్దకు రాగానే అతివేగంతో అదుపుతప్పి కిందపడింది. ఈ ప్రమాదంలో రమేశ్‌ తలకు గాయాలై తీవ్ర రక్తస్రావం కావడంతో అక్కడికక్కడే ప్రాణాలు కోల్పోయాడు. పోలీసులు ఘటనాస్థలానికి చేరుకొని మృతదేహాన్ని తరలించారు. మృతుడు హెల్మెట్‌ ధరించి ఉంటే ప్రాణాలు దక్కేవని ప్రత్యక్ష సాక్షులు తెలిపారు.