KTR vs Bandi sanjay: ఉగాది వేళ.. కేటీఆర్‌, బండి సంజయ్‌ పొలిటికల్‌ పంచాంగం చూశారా!

హైదరాబాద్‌: ఉగాది పండుగ వేళ భాజపా, భారాస మధ్య ట్విటర్‌ వేదికగా మాటల యుద్ధం కొనసాగింది. భారాస వర్కింగ్‌ ప్రెసిడెంట్‌ కేటీఆర్‌, భాజపా రాష్ట్ర అధ్యక్షుడు బండి సంజయ్‌ ఎవరికి వారు తమదైన శైలిలో రాజకీయ ఉగాది పంచాంగం చెప్పుకొచ్చారు. పరస్పరం రాజకీయ విమర్శలతో సాగిన వీరిద్దరి పంచాంగం సోషల్‌ మీడియాలో చక్కర్లు కొడుతోంది. కవిత ఈడీ విచారణ, టీఎస్‌పీఎస్సీ ప్రశ్నపత్రం లీకేజీ వ్యవహారం రాజకీయ వర్గాల్లో కాక రేపుతున్న సమయంలో.. తాజాగా ఉగాది పంచాంగం రాజకీయవేడిని మరింత పెంచింది. 

మంత్రి కేటీఆర్‌ చెప్పిన పంచాంగం ఇలా..

ఉగాది వేళ ఐటీశాఖా మంత్రి కేటీఆర్ వినూత్నంగా ట్వీట్ చేశారు. ‘‘ఆదాయం: అదానీకి, వ్యయం: జనానికి, బ్యాంకులకు. అవమానం: నెహ్రూకి, రాజపూజ్యం: గుజరాతీ గుంపుకి.  బస్, బభ్రాజీమానం భజగోవిందం! దేశీయ ఉగాది పంచాంగం సమాప్తం!’’ అని ట్విటర్‌లో పేర్కొన్నారు.

బండి సంజయ్‌ ట్వీట్‌ ..

‘‘ఆదాయం: కల్వకుంట్ల కుటుంబానికి. వ్యయం:  తెలంగాణ రాష్ట్రానికి. అవమానం: ఉద్యమ వీరులకు, అమరుల త్యాగాలకు. రాజ పూజ్యం: ఉద్యమ ద్రోహులకు, దొంగలకు. తుస్‌.. పిట్టల దొర, తుపాకీ చంద్రుల గడీల పంచాయితీ లెక్క తేలుడే తరువాయి. పతనం ఇక షురువాయే!!’’ అని ట్వీట్‌ చేశారు.