పెళ్లికి యువతి తల్లిదండ్రులు అంగీకరించలేదని.. యువకుడి బలవన్మరణం

రామచంద్రాపురం రూరల్‌, న్యూస్‌టుడే: ప్రేమించిన యువతి తల్లిదండ్రులు పెళ్లికి నిరాకరించారంటూ ఓ యువకుడు బలవన్మరణానికి పాల్పడిన సంఘటన రామచంద్రాపురం పోలీస్‌ స్టేషన్‌ పరిధిలో చోటు చేసుకుంది. ఎస్‌ఐ శశికాంత్‌రెడ్డి తెలిపిన వివరాల ప్రకారం.. స్థానిక కాకతీయనగర్‌లో నివసించే కట్టా హేమంత్‌కుమార్‌(25) ప్రైవేటు పరిశ్రమలో పని చేస్తున్నాడు. ఓ యువతిని ప్రేమించాడు. త్వరలో వారిద్దరూ పెళ్లి చేసుకోవాలని నిర్ణయించుకున్నారు. ఇందుకు అమ్మాయి తల్లిదండ్రులు నిరాకరించడంతో.. నాలుగు రోజులుగా హేమంత్‌కుమార్‌ ఎవరితోనూ మాట్లాడకుండా ఒక్కడిగానే ఉంటున్నాడు. బుధవారం ఉదయం తన ఇంట్లోని కుటుంబీకులంతా పనుల్లో నిమగ్నమై ఉండగా.. గదిలోకి వెళ్లి ఫ్యాన్‌కు ఉరేసుకున్నాడు. ఈ విషయాన్ని గుర్తించిన కుటుంబసభ్యులు.. వెంటనే ఆసుపత్రికి తీసుకెళ్లినా అప్పటికే అతడు మృతి చెందినట్టు వైద్యులు ధ్రువీకరించారు. మృతుడి తండ్రి స్టీఫెన్‌ కుమార్‌ ఫిర్యాదుతో పోలీసులు కేసు నమోదుచేసి దర్యాప్తు చేపట్టారు.