పండగపూట విషాదం

నాగార్జునసాగర్‌ బ్యాక్‌ వాటర్‌లో గల్లంతై యువకుడి మృతి

తుర్కయంజాల్‌ పురపాలిక, న్యూస్‌టుడే: స్నేహితులతో విహారయాత్రకు వెళ్లిన ఓ యువకుడు మృతిచెందాడు. తుర్కయంజాల్‌ కమ్మగూడ గ్రామం శ్రీశ్రీనగర్‌ కాలనీకి చెందిన గౌని జగదీష్‌ గౌడ్‌, శారద దంపతులకు కుమారుడు శివకుమార్‌గౌడ్‌, ఇద్దరు కుమార్తెలున్నారు. కుమార్తెల పెళ్లిళ్లయ్యాయి. గౌని శివకుమార్‌ గౌడ్‌(30) స్థానికంగా ఎస్‌బీఐలో పొరుగుసేవల ఉద్యోగి. ఇటీవలే ఉద్యోగం పర్మినెంట్‌ అయిన నేపథ్యంలో బుధవారం ఉదయం తోటి ఉద్యోగులు, మరికొంతమంది స్నేహితులతో కలిసి నల్గొండ జిల్లా చందంపేట మండలం వైజాక్‌ కాలనీలో నాగార్జునసాగర్‌ బ్యాక్‌ వాటర్‌కు వెళ్లారు. నది నీటిలో ఈత కొడుతూ అకస్మాతుగా గల్లంతయ్యాడు. వెంటనే పక్కనే ఉన్న ఓ మత్స్యకారుడు నీటిలో దూకి అతన్ని వెలికి తీయగా అప్పటికే మృతిచెందాడు.