జాతీయ రహదారులు హరితమయం

వరంగల్‌ జాతీయ రహదారిపై..

ఈనాడు, హైదరాబాద్‌: వరంగల్‌, నాందేడ్‌ జాతీయ రహదారులపై రూ.18.61 కోట్లతో చేపట్టిన మల్టీలేయర్‌ ప్లాంటేషన్‌ పనులు పూర్తయ్యాయని హెచ్‌ఎండీఏ బుధవారం ప్రకటనలో పేర్కొంది. రూ.15.04 కోట్ల వ్యయంతో వరంగల్‌ హైవే(ఎన్‌హెచ్‌ 163)పై 64 కిలోమీటర్లు, రూ.3.57 కోట్లతో నాందేడ్‌ జాతీయ రహదారి(ఎన్‌హెచ్‌-161)పై 33 కిలోమీటర్ల సెంట్రల్‌ మిడెన్‌ గ్రీనరీ, మల్టీలేయర్‌ పనులతో జాతీయ రహదారులు హరితమయమయ్యాయని పేర్కొంది. ఇప్పటికే శ్రీశైలం జాతీయ రహదారి (ఎన్‌హెచ్‌-765)పై శంషాబాద్‌ ఎయిర్‌ పోర్టు నుంచి మహేశ్వరం వరకు 18 కిలోమీటర్లు, కర్నూలు జాతీయ రహదారి ఆరాంఘర్‌ నుంచి షాద్‌నగర్‌ వరకు 25 కిలోమీటర్లు, శామీర్‌పేట్‌ నుంచి గజ్వేల్‌ వరకు దాదాపు 39 కిలోమీటర్ల వరకు చేపట్టిన సెంట్రల్‌ మిడెన్‌ గ్రీనరీ, మల్టీలేయర్‌ ప్లాంటేషన్‌ పనులతో పచ్చదనం కనువిందు చేస్తోందని వివరించింది.